Jambazi sugu ndani ya mwili wa binti asiye na hatia

• Inamhusu binti mpole na asiye na mvuto kwa marafiki wawili na siyo watu wengine.
• Binti huyo anakuwa “target” ya jambazi sugu anayetafutwa na polisi kila kona.
• Kwa kutumia nguvu za ajabu, jambazi huyo anafanikiwa kuiba mwili wa binti Kessler na kumwacha binti huyo ndani ya mwili wake.

Dar es Salaam. Ni ijumaa nyingine iliyo tofauti na zingine ambayo tunakuletea uchambuzi wa filamu yenye maudhui ya kufikirika ya “Freaky” ambayo itasaidia kukamilisha wikiendi yako.

Millie Kessler ni mwanafunzi wa sekondari na kutokana na mavazi yake na jinsi anavyojiweka, hana mafanikio ya kutiliwa maanani na mtu yeyote shuleni hapo isipokuwa rafiki zake.

Kwa watu, binti Kessler ndiyo ngoma ya kijiji kwa maana ya kwa kila anayejisikia kuonea mtu, mtu wa kwanza kumfikiria ni binti huyo ambaye kwa shule nzima, amefanikiwa kuwa na marafiki wawili tu.

Sifa za binti huyo, zinafanikiwa kukonga moyo wa muuaji matata maarufu kama Butcher ama Barney Garris. Kwa kutumia nguvu za ajabu, Butcher anamuwinda Kessler na kufanikiwa kubadilishana naye mwili.

Sura ya kipole, kudharauliwa na watu na kutotiliwa maanani ni mwili ambao muuaji yeyote angependa kuutumia.

Butcher aanza harakati zake

Butcher ambaye sasa yupo ndani ya mwili wa Kessler, anaanza kutekeleza mauaji yake kwa wanafunzi wa shuleni kwa Kessler! Ndiyo! Najua umeelewa.

Kwa upande mwingine, Kessler ambaye sasa yupo ndani ya mwili wa mwanaume anapitia wakati mgumu kwani hata rafiki zake wanamkimbia kwa hofu ya kuuliwa hadi pale anapowadhihirishia kuwa, ni yeye ila tu akiwa ndani ya mwili ambao siyo wake.

Soma zaidi:

• Vimbwenga vya babu na mjukuu havijawahi kumuacha mtu salama
• Hiki ndicho chanzo kikuu cha maumivu ya mgongo
• Mbinu zitakazowasaidia wahudumu kuvuta wateja wengi mgahawani

Hata hivyo, bahati mbayani kuwa, akiwa ndani ya mwili wa muuaji huyo, anaanza kutafutwa na vyombo vya dola ili atiwe nguvuni na kuhukumiwa kwa mamia ya mauaji aliyoyafanya.

Kessler ana muda wa chini ya saa sita kufanya kila awezalo ili arudi kwenye mwili wake au la sivyo, atabaki ndani ya mwili wa Butcher milele?

Fuatilia kisa cha filamu hii kupitia kumbi za kuangalizia filamu za Century Cinemax zilizopo katika maduka makubwa jijini Dar es Salaam yakiwemo Mlimani City na Aura Mall.