Unayotakiwa kuyafanya kuimarisha huduma kwa wateja mtandaoni

• Jibu kwa wakati meseji za wateja kwa upole na hekima huku ukilenga kutoa jawabu kwa kila swali unaloulizwa.
• Wape nafasi ya kutoa maoni na mrejesho wa matumizi ya bidhaa na huduma yako.

Ni dhahiri kuwa biashara nyingi kwa sasa ziko mtandaoni na kwa sehemu kubwa mitandao ya kijamii inatumika kama jukwaa muhimu la kuwafikia wateja na kukidhi mahitaji yao. 

Kama ilivyo mikakati mingine ya masoko, wateja waliopo mtandaoni nao wanahitaji huduma kwa mteja. Wanatakiwa kusikilizwa na kutatuliwa changamoto zao kwa wakati ili kujenga imani na uaminifu katika bidhaa na huduma zako. 

Kama bado hujui ufanye nini kuimarisha kitengo cha huduma kwa mteja mtandaoni? Basi fanya mambo haya yanayoweza kukusaidia kutoa huduma nzuri mteja mtandaoni:

Uwe msikivu, mwenye hekima na msaidizi

Mfanyabiashara kila unapokutana na wateja mtandaoni, jitahidi uwe msikivu, mtulivu, mwenye hekima na msaidizi kwa wateja wako kwa kila swali au ufafanuzi watakaoutaka kutoka kwako. 

Epuka dharau na maneno yasiyofaa kwa sababu vidole vyako vinaweza kuharibu biashara yako.

Mtaalamu wa masoko na Mwanzilishi wa kampuni ya WorldStream ya nchini Marekani, Larry Kim katika moja ya makala zake anasema kama una makundi ya kibiashara mtandaoni, hakikisha watu wanaelewa vizuri unachotarajia kuwapa na simamia vizuri mijadala yote bila kuathiri haki za mtu mmoja mmoja. 

Soma zaidi:

• Mbinu zinazowaweza kuwasaidia wajasiriamali kuchangamkia fursa zilizowazunguka
• Mambo ya kuzingatia unapoanzisha ‘brand’ yako ya biashara

Jibu meseji za wateja kwa wakati

Huduma kwa mteja ni pamoja na kutoa mrejesho au majibu ya maswali wanayouliza wateja kwa wakati ili kuhakikisha changamoto zao zinatatuliwa kama inavyotakiwa. 

Kama unatumia mashine (chatbots) mfano Facebook Messenger kuwafikia wateja wako, hakikisha mfumo wake unakuwa na uwezo na kasi ya kujibu maswali na kutoa ufafanuzi.

Ufanisi wa kujibu meseji za wateja unaimarisha mahusiano na kujenga uaminifu utakaosaidia kukua kwa biashara na kuyafikia masoko mapya ili kujiongezea faida. 

Huduma nzuri kwa mteja wako mtandaoni ndiyo mafanikio yako kibiashara. Picha|Mtandao.

Pitia kila mrejesho unaopewa na wateja

Kama mmliki wa biashara unatakiwa kuwa mtulivu na kuheshimu mawazo wanayotoa wateja wako hata kama hayana umuhimu katika biashara. 

Usibishane au kuzozana na mteja bali pokea changamoto na ukosoaji kwa tahadhari kubwa ikizingatiwa kuwa mtandaoni, watu wana tabia tofauti lakini wengine wanaweza kuwa na lengo kukuangusha. 

Chukua kila ukosoaji kama fursa ya wewe kusonga mbele na kuyafikia mafanikio unayokusudia kuyapata. 

“Kama kuna mtu hajaipenda huduma yako, muulize kwanini? Hii itawafanya wateja wajisikie wanasikilizwa na utajifunza kitu ambacho hukukiona wakati wa utoaji huduma,” anasema Kim.

Huduma nzuri kwa mteja mtandaoni zitakusaidia kujitanua kuwafikia watu wengi zaidi na kukuongezea wafuasi ambao ni fursa ya kutengeneza kipato zaidi.